حِوار مع أختي المُحجّبة .. لو كنتي حقيقي مُؤدّبة

Thursday, July 21, 2011 | Categories لأولياء الأمور, للبنات فقط

السلام عليكم ورحمة الله وبركاته

أختي العزيزة .. في البداية، أتمنى تسمعيني بذهن صافي وتفكري في كلامي، وتتأكدي إن كل كلمة حتقريها وراها نية حسنة، وخارجة بدافع الخوف عليكي وأماني بالتوفيق ورضا الله والسعادة الحقيقية في الدنيا والآخرة. إنت عارفة إننا في زمن صعب ومُستهدفين من أعداء الإسلام، وأكبر هدف بالنسبالهم هو إنت..!! أيوه إنت متستغربيش. إنت المرأة المسلمة، اللي هي أساس المجتمع. هم عارفين كويس إنهم لو أفسدوها حيخرب المجتمع وينحلّ، وهو ده حالنا النهاردة إلا من رحم الله. عارفة يعني إيه المرأة هي الأساس؟

حقولك مثال صغير يوضحلك الصورة. لما تشوفي مبنى ضخم ومتماسك أكيد حيعجبك، مش كده؟ ده في الحقيقة علشان هو قائم على أساس متين تحت الأرض، إنت مش شايفاه، لكن واثقة من وجوده وقوته علشان شايفة المبنى ثابت فوقه مع مرور الزمن. لكن لو شفتي مبنى تاني أساسه ظاهر ومش مردوم عليه كويس، والرطوبه والعوامل الجوية واكلاه. طبيعي ساعتها حتقلقي تدخلي المبنى ده أو تتعاملي معاه، لإنك مش واثقة من قوته وثباته. وكمان حتخافي على كل اللي بيتعاملو معاه، وعلى المباني المحطية بيه.

هو ده بالظبط حال المرأة المسلمة مع حجابها في المجتمع. المرأة هي أساس المبنى اللي ميصحّش تشوفي تفاصيله، لكن في نفس الوقت متقدريش تنكري وجوده وأهميته في بناء المجتمع القوي الثابت على القيم والمبادئ والأخلاق الحميدة. والأرض اللي الأساس ده متغطي بيها هو حجابها. لو كان كاشف أو واصف لأي تفاصيل من جسمها، لازم حتتآكل جُواها العفة مع الوقت ويقل عندها الحياء اللي هو شرفها الحقيقي. وزي ما الرطوبة والعوامل الجوية أكلت الأساس المكشوف للمبنى الضعيف، هي كمان حتبقى عُرضة للمعاكسات وصُحبة السوء والتحرش والإيذاء.

أختي الغالية ويا أولياء الأمور، الحجاب عُمره ما كان موضة ولا إيشارب يتلبس على الراس فوق البادي والبنطلون والهدوم الضيقة والمكياج والمانيكير والكعب العالي. الحجاب الصحيح لازم يحجب المرأة ويسترها عن أعين الناس ويداري مفاتنها، وبعد كده نتكلم عن جوهرها وأخلاقها. مش تلبس الضيق والمكشوف ونقول أصلها متربية وبنت ناس وعُمرها ما حتعمل حاجة غلط..!! بالله ده منطق؟! لازم الأول تلبسي حجابك زي ما ربنا أمرك، لإنه عنوانك ورمز لعظمة دينك اللي كرّمك وصانك، وصورة لعِفتك وحيائك قدام الناس. لبسك كله لازم يكون واسع وفضفاض من مُقدم الرأس لحد أطراف صوابع قدمك.

متضحكيش على نفسك..!! أو تخلي غيرك يضحك عليكي وتقولي أنا منتظرة لما أتخطب أو أتجوز وبعدين ألبس الحجاب الصحيح. الزواج الصالح رزق من الله، فكيف يُرجى بغير طاعته والالتزام بأوامره؟! ثم إنت تضمني منين إنك تعيشي لحد ما ييجي ابن الحلال؟! وتضمني منين لو جه وإنت على حالك ده إن ربنا يتمملك معاه بخير، أو تقدري ترجعي للحجاب الصحيح؟! خلي بالك إن قلوبنا مش بإيدينا، والتوبة كمان رزق من عند ربنا بييجي للي بيجاهد نفسه على ترك المعاصي من غير إصرار عليها.

خليكي جوهرة مكنونة، غالية ونفيسة، ومتبقيش من البنات اللي فاكرين إن اللبس والمظاهر هي اللي حتجيبلهم ابن الحلال، حتى لو أهلك شجّعوكي على ده..!! المظاهر ممكن تجيبلك عريس، لكن عُمره ما حيكون الزوج الصالح اللي بتتمنيه. اللي حييجي حيكون قاصد جسمك بس ومُتعته الزايلة منه. لا يهمه شخصك ولا جوهرك، لإنك بالنسباله زيك زي أي بنت شكلها لذيذ وجسمها حلو. وزواجه منك لو تم، حيبقى مجرد وسيلة بيلجألها للاستمتاع من غير قيود. وبعد كده سهل جداً وطبيعي عينيه تزوغ على غيرك. لإنه من البداية مكنش قاصد لا زواج ولا تكوين أسرة بقدر رغبته في مُتعة غير مُقيدة مع أنثى استفزّت غريزته وطمّعته فيها، ومشافش فيها غير الجسد.

أختي المسلمة، حجابك عند ربنا زي صلاتك بالظبط. ينفع تصلي الظهر 3 ركعات بدل 4 عن عمد، وتقولي أنا صليت الظهر أحسن من غيري أو بنسبة 75% وربنا حيأجرني؟! كلام غير منطقي طبعاً، وصلاتك ساعتها حتبقى باطلة وغير مقبولة. نفس الحال مع حجابك، لازم تلبسيه زي ما أمرك بيه ربنا ورسوله عليه الصلاة والسلام، لإنه فريضة واجبة عليكي. لمّا تلبسيه بشكل مخالف عن عمد، أو تحت أي ظرف أو مُبرّر، إنت مش بس بتضيّعي على نفسك أجره وثوابه، لكن كمان بتخليه باب مفتوح عليكي بالسيئات طول الفترة اللي إنت لابساه فيها. بالظبط زي اللي بيدخن أو بيسمع أغاني بصوت عالي أو بيرتكب أي معصية بمنتهى الجرأة قدام كل الناس.

افتكري دايماً إنك إنسانة ربنا ميّزها بالعقل وكرمّها بالدين، مش مجرد كائن جنسي علشان تعرضي مفاتنك لكل الناس، وترجعي تشتكي من تعرّضهم ليكي. بلاش تبقي إمّعة تمشي تبع التيار من غير ما تفكري وتدركي وتقاومي. ولو قلتي البنات كلهم بيلبسو كده دلوقتي وهو ده اللي ماشي، يبقى بتغالطي نفسك وغضيتي الطرف عن البنات الملتزمة حتى لو قلة في الزمن ده. سؤال بسيط .. لو كنتي ماشية ولاقيتي حفرة كبيرة مليانة نار، وشفتي كل البنات بترمي نفسها فيها، تقلديهم وترمي نفسك وراهم؟! أكيد لا، وحتفكري ألف مرة وتقولي عليهم مجانين..!! نجّ نفسك قبل فوات الأوان، وإوعي تكوني من الكاسيات العاريات اللي رسولنا عليه الصلاة والسلام صنفهم من أهل النار وحَرّم عليهم الجنة حتى ريحها. واعلمي إن محدش بيشيل وزر حد، ولا شيء حينفعك إلا عملك الصالح وخوفك من ربنا اللي أنعم عليكي في الدنيا.

في النهاية، أتمنى يكون كلامي دخل قلبك ووجد جواه صدى نابع من الخير الحقيقي جواكي، واللي مش ممكن أبدا ينطفي مهما حاول أعداؤنا بكل الطرق إنهم يخمدوه أو يخدّروه. ربنا يرضيكي ويرضى عنك، ويصرف عنك السوء وولاد الحرام، وشر هوى النفس وكيد شياطين الإنس والجان، ويُؤتي قلبك تقواه ويملاه بحُبه وحُب كل عمل يُقرّبك لحُبه، ويُطهّر قلبك من كل دنس ومن كل حقد أو كراهية أو ضغينة، ويُثبّت أقدامك على طريق الحق ويرزقك اتباعه، ويُبعدك عن طريق الضلال والغواية، ويهديكي دايما للي فيه الخير، وينوّر بصيرتك لما تنصلح عليه سائر أمور دينك ودنياكي.. آمين.

فليقولوا عن حجابي .. لا وربّي لن أبالي

فليقولوا عن حجابي .. أنّه يُفني شبابي

وليُغالوا في عتابي .. إنّ للدّين انتسابي

لا وربّي لن أبالي .. هِمّتي مثلُ الجبال

أيُ معناً للجمال .. إن غدا سهلَ المنالِ

حاولوا أن يخدعوني .. صِحتُ فيهم أن دعوني

سوف أبقى في حصوني .. لستُ أرضى بالمجون

لن ينالوا من إبائي .. إنني رمز النقاءِ

سِرت والتقوى ضيائي .. خلف خير الأنباءِ

إنّ لي نفساً أبيّة .. إنها تأبى الدَنِيّة

إنّ دربي يا أخيّة .. قدوتي فيه سُميّة

مِن هُدى الدين اغترافي .. نَبعُنا أختاه صافي

دَربُنا دَرب العَفاف .. فاسلكيه لا تخافي

ديننا دين الفضيله .. ليس يرضى بالرذيلة

يا ابنة الدين الجليله .. أنتِ للعَليا سليلة

باحتجابي باحتشامي .. أفرض الآن احترامي

سوف أمضي للأمام .. لا أبالي بالمَلام

•·.·´¯`·.·• روابط الاستماع والتحميل •·.·´¯`·.·•

http://ar.islamway.com/nasheed/1951

http://www.saaid.net/flash/df5e7030ba.swf

حجاب المرأة المسلمة
صفات الحجاب الشرعي

إلى كل فتاة .. رسالة هامة

رسالة خاصة إلى الفتاة الجامعيَّة

رسائل إلى أختي المحجبة 1/2

رسائل إلى أختي المحجبة 2/2

فليقولوا عن حجابي .. لا وربّي لن أبالي
كفاية بقى تعبنا .. إيه الحل !؟