خلاصة التعارف الجاد وحقيقة الحب

Thursday, March 17, 2011 | Categories الصحوبية والارتباط, للبنات فقط

خلاصة التعارف الجاد بغرض الزواج

البنت أو الست، هي اللي معاها كل مفاتيح التعارف، تقدر تمشي اللي بتكلمه زي ما هي عايزة، وطبعاً لازم يكون بعلم أهلها ومباركتهم، إما تجرّؤه عليها وتخلي نظرته ونيته من ناحيتها تتغير، بكتر الضحك والهذار والكلام فيم لا يفيد، أو تجبره بطريقة غير مباشرة، إنه ميخرجش معاها عن حدود الأدب وضوابط الحوار، ويعرف إن ملوش معاها غير طريق واحد بس هو الزواج الشرعي المُعلن

ساعتها بس، إما يكمل معاها، لو هو فعلاً شخص كويس، جاد في نية الارتباط، ويصلح كزوج، أو ياخدها من قاصرها ويخلع، ويدوّر على غيرها من اللي تقبل وتسمح بسذاجة أو استهتار، إنه يتسلى بيها ويضيع وقتها ويعيّشها في وهم الحب والارتباط والزواج، ويغني عليها بكلام فارغ ووعود ملهاش أساس، وبعد كده تلاقيه فص ملح وداب، بعد ما يكون خد من مشاعرها وأحساسيسها اللي قدر عليه

لو إنت بنت أو ست مخطوبة، أو بتتعرفي على حد بغرض الزواج، تحبي يكون الشخص اللي بتكلميه ده أي واحد من دول؟؟؟ إنت لوحدك اللي في إيدك الاختيار !!!

المفهوم الحقيقي للحب قبل الزواج وبعده

الحب قبل الزواج، إحساس داخلي غير منطوق، بيحصل في فترة التعارف الجاد، بعد القبول المتبادل، وكنتيجة طبيعية للحوار الصادق، والتوافق في الأفكار، وإنك تحسي بجد إن الشخص ده بيكمل شخصيتك وبيضيفلها من صفاته اللي يخليها أحسن. وإنه هو اللي تقدري فعلا تكملي معاه حياتك في أمان وسلام وسعادة

الحب بعد الزواج، ترجمة للحب اللي حصل قبل الزواج، منطوقة ومحسوسة ومباحة، لإنه ساعتها بس حيبقى حب حقيقي وصادق مبني على أساس سليم، وساعتها بس برضو ينفع يبقى فيه كلام عن العشق والهوى، وميسدات على الموبايل لو واحد فيهم برّه أو بعيد عن التاني، وغمزات وتسبيل، وخروج وفسح وتنطيط. لكن تخيلي لو عكسنا الآية زي ما بيحصل في أغلب الحالات !!!

حتلاقي إن الفترة القصيرة للتعارف أو الخطوبة، بتروح أساساً في الاستنزاف العاطفي الغير مشروع في الوقت ده، وفترة الزواج اللي هي المفروض تستمر العمر كله، بيصطدم فيها الاتنين غالباً، بعد أول كام شهر، بالحقيقة المُرّة إنهم ملحقوش يعرفو الطباع والشخصيات الحقيقية لبعض، وإنهم مش قادرين يواجهو مسؤوليات الزواج وأعباء الحياة ومشاكلها بفكر واحد ويد واحدة، ومن هنا بتظهر الخلافات الزوجية الحادة لا قدر الله

ولو متمّش علاج الخلافات دي بالحوار الهادي والمناقشة الموضوعية، اللي ساعتها طبعا حتكون متأخرة لإنها بتتم بعد الزواج، لازم حتكون نهاية الحياة الزوجية، إما بخرس عاطفي بين الاتنين، يعني عايشين في مكان واحد، لكن أغراب في طريقة تفكيرهم ومعالجتهم للأمور، وده طبعاً بينعكس سلباً عليهم وعلى الأولاد لو ربنا رزقهم. أو تستمر الخلافات والصراعات دي بشكل يتفاقم مع الوقت، لحد ما توصل للطلاق أو الانفصال لا قدر الله

بدعي ربنا إنك تستفيدي بالرسالة دي، ويرزقك الزوج الصالح والذرية الصالحة اللي تقر بيهم عيناكي، وتنصلح بيهم سائر أمور دينك ودنياكي ... آمين

هام جداً .. للبنات والسيدات فقط